الغردقه بعد الثوره 1

سبحان الله قامت الثوره و لسه ما قعدتش ،والغردقه حالها لم يتغير كثيراً... اللهم إلا ناسها نفسهم.....يعني أيام الثوره طبعاً البلد كانت فاضيه تماماً من السياح و كمان كتير من الأجانب المقيمين سابوا البلد و رجعوا بلادهم و لكن سريعاً الحمدلله رجعت حركة السياحه لطبيعتها "إلي حدٍ كبير"و كمان بعض المقيمين رجعوا تاني لحياتهم في الغردقه و كأن شيئاً لم يكن... ولكن ....أكيد حالنا زي حال مصر كلها ،في حاله من الخوف و الترقب الحذر مسيطره علي الناس "مصريين و أجانب" بس أكيد الحياه لازم تمشي......

الناس بتحاول تتغلب علي الحاله الغريبه اللي سايده دلوقتي،عن طريق الإجتماعيات مثلاً ...و الأعمال الخيريه و بعض الممارسات السياسيه ..... لكن اللي أنا لاحظته بشكل شخصي ان في حاله من الرواج الإجتماعي و الفضل في كده للفيسبوك صراحةً...
مره واحده.. دائرة الغردقه علي موقع التواصل الإجتماعي الفيسبوك إتسعت بصوره ملحوظه جداً...ناس كانت بتشوف بعضها بصوره متقطعه أو عابره و أصبحوا أصدقاء بعد صداقتهم علي الفيسبوك.....و ناس إتعرفوا علي بعض لأول مره عن طريق الفيس .... والكثير الكثير من الجروبات اللي بتعلن عن منتجات أو اللي بتقدم خدمات أو حتي لمجرد التواصل و التعارف....

أقدر أقول ان مدينة الغردقه أخيراً عثُرت علي نفسها و أصبح لها طعم و لون مختلف ...يارب كده عقبال شوارعها اللي حالها ما يسرش لاعدو ولا حبيب ..آمين يارب

ونكمل جولتنا الشيقه في مدينة الغردقه الساحره

عن أماكن الفُسح والتسوق وممارسة الأنشطه المختلفه::





1_الغوص: واذ لم تكن غواصا عليك بالسنوركل يعني تلبس زعانف ونضارة وقصبة تنفس وتنزل في البحر وتشوف بدائع خلق رب العزة والجلال في البحر والشعاب المرجانية والاسماك. ملاحظه: لازم تكون سباح جيد وكمان يكون معاك واحد متخصص ملاحظه اخرى: تاكد انا الموج مش عالى ولو انه صعب فى الغردقه الموج يكون عالى.

 واذا لم تكن غواصا ولم تكن متأكد من سلامة امكانيتة السنوركل‘ فلن يفوتك جمال البيئة البحرية ..ممكن تاخد غواصه زجاجية وايضا مركب أرضيتة من زجاج إختار أحدهما واطلع فيه وتمتع انت ومجموعه رائعه من السياح بالطبيعه الساحرة للبحر الاحمر
 2-ألف ليله وليله: هو اسم العرض اليومي طوال السنة الذي تقيمه قرية الف ليله وليله في مسرحين ضخمين جدا. ...عندما تصل الى القرية وتدخل الى الباب تحس انك في خان الخليلي حيث كل المحلات تبيع قطع تذكارية وتراثية بالاضافه للمطاعم الصغيرة والكافيتريات والشاورما ومقاهي الشيشه والبار... كل هذا بامكانك عملة الى ان يبدأ العرض الأول وهو عرض للفنون الشعبية المصرية

 (رقاصه وصعايدة واسكندرانيه وفرق صوفية ونوبية واحلاهم واخفهم دما فرقه الينبعاوية) ...بعد نهاية العرض الاول حوالي ساعتين ...مباشرة يتم الانتقال الى مدرج مثل ملعب الكرة لمشاهدة عرض الصوت والضوء الفرعوني في مسرح كبير جدا يحكي تاريخ الفراعنه وقصة فتاة النيل وغيرها بممثلين وممثلات وإمكانيات رائعه كأنك في مهرجان ضخم مع انة عرضاً يوميا... بعد نهاية العرض الفرعوني تدخل الخيول المصاحبة لفرقة الصعايدة ويقومون بترقيص الخيول واللعب معها الى نهاية الحفل بعد ساعتين ايضا

 3-السفاري: توجد رحلات سفاري خارج الغردقه لمناطق البدو والجبال وده ممكن بالموتوسيكلات الخاصه بالتعامل مع الصحراء وممكن بالجيب وهناك يقدم لكم العشاء أو الغداء وغالبا مشوى على الطريقه البدويه ...انا اعشق هذه الرحله وانصح بيها جدا

 4-القريه المائيه: أو الأكوا مارين وهي قرية مائية فيها العاب مائية للكبار والصغار ورااائعه جدا تقع في قرية الياسمين



5-التسوق: إذا حبيت تروح الدهار لالقاء نظرة على البلد وعلى أسواقها ومطاعمها ومقاهيها الشعبية فلا بأس....فالدهار هي المنطقه الأنسب لذلك ،وهتلاقي فيها كمان سوق الخضار الأساسي في الغردقه ...اللي كل حاجه فيه بتيجي فريش و أسعارها عاديه جداً زي أي سوق خضار في مصر.
6-الجونه: قرية الجونة السياحية وهي تعتبر قرية سياحية مثالية من ناحية توفر جميع الخدمات بها ولا حاجه للخروج منها ولكنها تقع خارج الغردقه بمسافه 30 كلم والمناظر الطبيعيه الصناعيه خلابه وجميله واشعر وانا ببعض المناطق هناك انها قطعه من الريف الاوروبى....كمان الجونه مشهوره بمنطقة المارينا ..اللي ممكن تشوف فيها لانشات غايه في الفخامه و الروعه ...ده حتي ممكن تلاقي يخت لشخصيه مشهوره راسي علي مارينا الجونه...كمان هتلاقي في نفس المنطقه أشيك المحلات ..ياسلام تخيل انك بتتسوق من مكان بيطل ع البحر ...و طبعاً هتلاقي أشهر الماركات العالميه في مكان واحد ...تخيل!!!!


 دا اللى انا فاكراه من الفسح فى الغردقه ولو افتكرت حاجه تانيه اكيد هارجع لكم اه متنسوش البحر والشمس دى اشهر حاجه مشهوره بيها الغردقه

شكراً ليكي يا نوشه انك لففتينا الغردقه كلها في لحظات

للناس اللي حابين يتعرفوا أكتر علي الغردقه (معلومات عامه)

صديقتي العزيزه و رفيقتي في غربتي هي اللي تعبت في جمع المعلومات دي يا جماعه ...فأرجو توجيه الشكر لها هي وليس لي....

تتكون الغردقه من أربع مناطق أساسيه وهي:

1. السقالة: وفيها كل الاسواق والمطاعم والمنتجعات والفنادق والبنوك والسوبر ماركت والحلاقين والمغاسل ومكاتب السياحة ومراكز الغوص والشواطيء العامة المفتوحة للجمهور والكوفي شوب والديسكو (يعني هي الزبدة وافضل مكان في المدينة للتنزة مشيا على الاقدام وبدون ملل ) لو سكنت فيها لن تستخدم مواصلات نهائيا.

2. الهضبة: سميت الهضبة لانها فعلا وانت ماشي في شارع السقالة الرئيسي ترتفع بك الارض باتجاة هضبة ضخمة تطل على شاطي البحر وهي تقع قريبا جدا من السقالة وفيها القرى السياحية والمنت

 والمنتجعات الحديثة والفخمة جدا(مثل.. السندباد الهيلتون الشيراتون )

3. الدهار: منطقه الغردقة القديمة او البلد وهي فيها الاحياء الشعبية والمقاهي الشعبية ويسكنها اهل البلد الاصليون من غير العاملين في السياحة( يعني الصيادين والفلاحين والناس العاديين من سكان الغردقه)

4. منطقه طريق المطار: وفيها المنتجعات السياحية المهمه مثل: الف ليله وليله, قرية مجاويش, قرية ياسمين, والحديقه المائية)

بالنسبه للأكل

1. مطاعم السمك في الغردقة احلى شيء يوجد مطعمي المفضل وهو مطعم اسماك الميناء في شارع السقالة اسأل أي احد في الشارع عنه لانه اشهر مطعم في البلد ومكون من ثلاثه ادوار الارضي والثاني مطعم للاكل  والثالث للشيشة والانترنت والبار، ايضا يوجد مطعم الجوكر بالضبط امام ميدان السقالة الرئيسي وهو مشهور جدا مثل الميناء لكن انا احب المينا اكثر لان جوة احلى وديكورات حلوة والمينوو كبيرة جدا ومتنوعه والاهم لذيييييذ.

2. كل المطاعم العالمية موجوده في شارع السقالة والهضبة مكدونالدز بيزاهت برجركنج .....الخ

3. المطاعم الشعبية يوجد في السقالة مطعم اسمة فول ابو آيه حكايته معايا ومطعم الطعمية الطعمة اوي والكثير من المطاعم الشعبية للكبدة والتقاطيع تجدها في منطقة الدهار (البلد).

4. في السقالة ايضا توجد مطاعم هندية صينية وروسية واوروبية معقولة اسعارها جدا

 5- دا كمان موجود الممشى اللى فيه القعده الحلوه والتمشيه الجميله فى مطاعم بيتزا هت وكنتاكى ومكدونالدز وكمان فى كفيهات زى كورسينى اللى البتزا بتاعته حكايه اكلتى المفضله

6. وفى سينزو مول عنده مطاعم تيك أواى وقعده جميله دا مكان يناسب الستات اكتر علشان الشوبنج كل ما تريديه هناك وبعد ما تتعبى من الشراء هناك اماكن للاكل بكل انواعه صينى هندى لبنانى واسماك وفى مطعم شيك اوى ومبتكر اسمه بلانت افريكا دا تحفه واسعاره يعنى حلوه بالنسبه لمكانه وجماله

وهنرجعلكم تاني أنا ونشوي بمعلومات أكتر عن الغردقه ...سلام

الغردقه كمان و كمان

يا سلام ...شيئ ممتع جداً انك تتكلم علي الناس و تجيب في سيرتهم عمال علي بطال و تقطع فروتهم كمان....هنعمل إيه طبيعة النفس البشريه...وطبيعة الستات بشكل خاص....علي الرغم إني ياما جاهدت نفسي علشان ما أدخلش في حلقات النميمه النسائيه ،لكن ما كنش له لازمه الجهاد ... لإن في النهايه بكون معبيّه جوايا كلام كتير و أول ما بشوف أي حد علطول بنفجر و الكلام بيتكر و ما بقدرش أوقف نفسي.... وياسلام علي كمية المشاكل اللي وقعت فيها نتيجة كتر الكلام ... بس الواحد هيعمل ايه ،هو ده حال المدن الصغيره ...الناس تقريباً هنا كلها عارفه بعضها... وفي نوع من أنواع الفراغ العائلي العاطفي عند معظم الناس هنا ، نتيجه لعوامل كتير أهمها ان معظم الناس عايشين بعيد عن عيلتهم الكبيره... يعني من غير إخوات و لا ولاد خاله و لا ولاد عم وكده

وكمان سفر الأزواج كثيراً نتيجه لعملهم بالسياحه 

وطبعاً بتكون النتيجه فراغ يؤدي إلي ثرثره

بصراحه أي حد ممكن يتكلم عن الموضوع أحسن مني بكتير ... لإني معتزله التجمعات و اللقاءات إلي حد ما... وده لإني كسوله إجتماعياً بصراحه.... لكن برده من اللي الواحد شافه ، فإخترت إني أتفرج من بعيد ...و أتعلم

مش عاوزه أظلم أهل البلد دي و الله كتيييييييييييييير منهم ناس محترمين و علي قدر كبير جداً من الرقي و الوعي و الثقافه... لكن في النهايه مجتمع الغردقه ما هو إلا جزء لا يتجزأ من النسيج الإجتماعي المصري اللي حاله لا ما يسُرش لا عدو ولا حبيب

فطبعاً في عيوب كتيره كمان ... أهمها و أوضحها لكل الناس اللي عرفتهم هنا ..إن حد يتقرب منك لإن له مصلحه عندك أو هيقدر يستفيد منك في حاجه .... طبعاً ده بقي العادي في مجتمعنا المصري ..و أي حد هيقولي انتي عاوزه تعيشي في المدينه الفاضله...هقوله آه ..كنت فاكره إن الغردقه هي المدينه الفاضله...لكن كنت حالمه طبعاً

المهم ...و لما تخلص المصلحه بينكم ..ممكن ما تعرفش تشوف الشخص ده تاني علي الرغم ان البلد صغيره

وعلي النقيض تماماً... تلاقي مجموعات من الناس بيجمع بينهم شيئ مشترك، الجنسيه مثلاً أو مدرسة الأولاد...تلاقيهم قريبين جداً من بعض ودايماً موجودين لمساعدة بعض ...يخرجوا و يدخلوا مع بعض...وما فيش مانع أبداً العلاقه تكون منافع متبادله برده ..لكن بشياكه شويه....و غالباً اللي بينجح في تكوين المجتمعات دي هم الأجانب طبعاً... و إحنا كمصريات لا نملك غير الغيره من قدرتهم علي إيجاد الوقت و المجهود لتكوين المجتمعات دي ....و محاولات كتير لتكوين كيانات مشابهه ولكن بيكون مصيرها الفشل و جلب المشاكل ونشر الشائعات و القيل و القال ...و التفرق و الإنغلاق علي النفس مره أخري

مش قلتلكم أنا ممكن أكون أسوأ واحده تتكلم عن الإجتماعيات ...لكن معلش إستحملوني لحد ما أبني مدينتي الفاضله

سلام

الغردقه ... ليه؟

إحنا كنا بنقول إيه؟؟؟....آآآآه الغردقه و حلاوتها و جوها الرائع ....إنها البلد التي لا تغيب عنها الشمس أبداً...اللهم إلا أيام قليله في الشتاء...مما يجعلها المدينه المثاليه لتنشئة طفل ولممارسة الرياضات البحريه ...ويا سلام المكان الأنسب لمحبي اللون الدهبي و البرونزي الفظيع ...وكما يُقال إن الغردقه فيها أجمل مناطق الغطس في العالم...آه بالمناسبه عندنا حدث للغطس يوم 26 يوليو2011 عاوزين يجمعوا أكبر عدد من الغطاسين في اليوم ده للدخول في موسوعة جينيس!!!!!

الناس هنا عباره عن خليط من محافظات مصر كلها...مش بس محافظات مصر ومن دول كتيره كمان....يعني هتشوف ناس من الشرق وناس من الغرب وناس من الشمال و ناس من الجنوب....لكن أكتر ناس بيحبوا يعيشوا هنا أو أكتر نسبه شفتها كانت من الإسكندرانيه و من الصعايده "طبعاً أجدع ناس"وبعد كده القاهريين وبعد كده الشراقوه وغيره

فطبعاً لازم تكون بتحب التنوع و إختلاف الثقافات لو حابب تعيش في الغردقه

كمان الأجانب بيموتوا في العيشه هنا ...والبعض الآخر بيفضل يقضي فترة الشتا في بلده الأم ،هنا في الغردقه،يعني هرباً من البرد القارس في الشتاء و خاصة في أوروبا

فعادي جداً جداً إنك تكون ساكن في بيت و معظم، إن لم يكن كل جيرانك، أجانب من جنسيات متنوعه...فمثلاً هتلاقي ألمان كتير و الأكتر منهم الروس ...وهتلاقي برده بولنديين و أوربيين شرقيين كتير...

ونتيجه لهذا التنوع الإجتماعي ..فإن المصريين اللي عايشين هنا تلاقيهم مديين علي خواجاتي شويه... كتير بلاحظ نوع من التشتت بين الأصول المصريه الشرقيه وبين حرية و إنفتاح الأجانب... لكن مع الوقت المُلاحظات دي بتقل ...و الواحد بيحس إن ده عادي يعني...

لاااااااااااا د أنا لو فتحت في حكاوي الناس اللي هنا مش هبطل و هعمل فضايح كتيييييييييييييييييييييير

و للحديث أكيد بقيه..

الغردقه أول مره 1

أول مره أفكر ان بقالي 6 سنين عايشه في الغردقه..البلد الهاديه ..الرايقه ...حيثُ الميه و الهوا و "الوجه الحَسن"فاهمين طبعاً...

وده بحكم اني اتجوزت هناك ...وكان علي عيني أسيب القاهره بزحمتها بتلوثها بناسها الكشريين...أفتكر اني أول سنتين ما كنتش طايقه الهدوء المميييييييييييييت اللي مسيطر ع  البلد ...رغم لياليها الصاخبه في المراقِص و النايت كلابس ،اللي أنا ماليش فيهم بالمناسبه

لكن بصراحه و الحق يُقال انها بلد جميله و محظوظه بوجود هذا الكم الكبير من الفنادق و القري السياحيه و الكافيهات و المطاعم و البيتشات ...ومناخها كمان الصافي إلي حد كبير جداً لدرجة إنك تحس إن نظرك إتحسن و بقيت بتشوف الدنيا مزهزهه

وده إعتراف مني اني كنت فعلاً كارهه البلد ...لكن لمست الفرق بينها وبين غيرها لما كنت كل ما أنزل القاهره ألاقي حالها بيسوء مره بعد مره...قلت لا ..دا أنا في نعمه و أنا مش حاسه و مش عارفه أستمتع بيها...و بدأت أحبب نفسي فيها و بدأت آخد علي هدوءها اللي ما استمرش كتير صراحه...لإن حركة البناء و العمار سريعاً ما طالت البلد و إتملت عمارات و بيوت و فيلات و فنادق و قري سياحيه....وللحديث بقيه 

;))

http://www.youtube.com/watch?v=q2kseK5AuB4

لقد نفذ رصيدكم ....

لقد نفذ رصيدكم

by Samar Fawzy on Sunday, May 8, 2011 at 2:14pm

دلوقتي أقدر أقول بالفُم المليااااااااااااااااااان...المجلس العسكري لزماً لزماً يرحل

لا عارفين يحِلُوا ولا يربطوا والناس هتاكل بعضها وهم مافيش في إيديهم غير المحاكم العسكريه اللي ما بقتش تخوف الناس أصحاب النفوس الضعيفه ...اللي بايعه أرواحها للشياطين اللي عاوزين يولعوا في البلد

كده كفاااااااااااايه علشان خلاص ما فيش بعد كده

لقد نفذ رصيدكم خلاص

إلحقوا إخلعوا قبل ما الناس تنسي جمايلكم اللي مغرقانا الصراحه

مجلس رئاسي يا إخولنا لمدة سنتين وسيبنا بقي من كل العك اللي حصل في التلت شهور اللي فاتوا دول...وسيبنا بقي من لعبة الإنتخابات الرئاسيه دي ...الناس أساساً مش عاجبها أي حد من المرشحين...يبقي نستني يمكن يطلع لنا صلاح الدين...اللي هنمشي وراه وإحنا مغمضين....لكن تقول لمين

اللي حصل في إمبابه ما هو إلا بدايه جديده لدوامه وحلقه مفرغه مش عارفين هنطلع منها إزاي....وحتي لو الفلول هم اللي ورا القصه دي كمان...العيب مش عليهم ،العيب ع اللي سايب لهم البلد يبرطعوا فيها وينفذوا خططهم وينجحوا في اللي بيعملوه كمان...والحل مش حظر التجول حول منطقة الكنيسه....وما حدش يقولي طب إيه هو الحل لإن مش أنا اللي المفروض أفكر في الحل ...للأسف ما فيش في إيدي غير الدعاء و الترحم علي أرواح اللي ماتوا وتمني الشفاء للي أُصيبوا

إنتوا عارفين كل ده هينتهي إمته؟؟؟؟؟

لما تلاقي خانة الديانه في بطاقتي مكتوب فيها

مصريه :)

إيه هتضيعينا تااااااااااااااااااني

بعد ما كنا خلاص إتلمينا ..هتضيعينا وتفرقينا 
وفي بلاد الله ..لخلق الله ..هتشحططينا
وتفرجي العالم كله علينا


رايحه علي فين و هتسيبينا...علي فتنه طائفيه ...ولا علي حرب أهليه...تعبنا وفاض بينا
بناكل في بعض و لا الأغراب...والله عيب علينا


كلنا خايفين علي بلدنا و علي ثورتنا اللي العالم كله انبهر ببياضها وإنهرده بيستنفر دمويتها...لكن في إيدنا إيه غير الدعاء الدعاء
لجل ترجعي تاني تلملمينا ... محمد و أخوه مينا.

يا أهلاً بيكم يا كل المتابعين

والله هتشرفوني بإنضمامكم لمدونتي المتواضعه

و أتمني الموضوعات اللي أكتبها تنال إعجابكم 

انتظروني مع أول موضوع في القريب العاجل بإذن الله

:)